حمد-ماہر القادری

حمد اور اس کی تشریح

خالق بھی ، کارساز بھی ، پروردگار بھی

وہ جس کی ذات پردہ کشا ، پردہ دار بھی

تشریح:

اللّٰہ کی توحید اور اس کی لامتناہی کا تذکرہ اس کی محبت میں ڈوبے ہوئے انداز میں کرتے ہوئے شاعر کا کہنا ہے کہ ہر بے جان جسم میں روح پھونک کر زندہ کرنے والا ، بگڑے کاموں کو بنانے والا اور پالنے والا ہمارا پاک پروردگار اللّٰہ ہی تو ہے ۔ اللّٰہ تعالی ہی انسان کا محرم راز ہے جو انسان کی اچھائی، انسان کے عیبوں پر پردہ بھی ڈال سکتا ہے اور چاہے تو ظاہر بھی کر سکتا ہے۔ اللّٰہ کی ذات ہی تو ہے جو ظاہری آنکھوں سے مجسم نظر نہیں آتی مگر اس کا جلوہ ہر ایک چیز میں عیاں ہے۔

ذکر خدائے پاک جو ہے جلَ شَانَهُ

تسکین روح بھی ہے ، دلوں کا قرار بھی

تشریح:

پاک میں اللّٰہ تعالی خود ارشاد فرماتے ہیں کہ دلوں کی راحت اور سکون تو اللّٰہ کے ذکر میں ہے اسی بات کی طرف شاعر بھی اشارہ کر رہے ہیں اور گویا ہے کہ اللّٰہ سبحانہ تعالیٰ کا ذکر کا چین اور روح کا آرام ہے۔ آزمائش کی گھڑی میں انسان کو پروردگار ہی یاد آتا ہے۔ اللّٰہ کا ذکر انسان کو ذہنی سکون میسر کرتا ہے اور انسان ذہنی تنگی سے آزاد ہوتا ہے

سب ہیں اسی کے حکم سے دن ہو کہ رات ہو

شامِ خزاں بھی اس کی ہے، صبحِ بہار بھی

تشریح:

شاعر خداوند تعالیٰ کی عظمت و بڑائی کو ایک منفرد انداز میں بیان کرتے ہوئے کہتے ہیں کہ دن رات کے آنے جانے میں اور موسموں کے بدلنے میں اللّٰہ کی قدرت کی نشانیاں ہیں۔ نظامِ کائنات اس بات کا شاہد ہے کہ اس دنیا کو چلانے والا بے حساب قوت اور قدرت کا مالک ہے۔ دنیا کا ہر نظارہ اس کے کُن کا منتظر رہتا ہے۔ خدا ہی وہ ہستی ہے جو ہماری زندگی میں غم کی شام اور مسرت کی صبح لاتا ہے۔

قدرت سے اس کی گرمِ سفر ہیں یہ مہر و ماه

موجِ نسیم بھی ہے رواں، آبشار بھی

تشریح:

شاعر کہتے ہیں کہ زمین و آسمان میں قدرت کی پھیلی ہوئی نشانیاں بار بار انسان کو اپنی طرف متوجہ کرتی ہیں۔ چاند و سورج آسمان پر اپنے سفر میں رواں دواں ہیں اور زمین پر صبح کے وقت چلنے والی ہوا اور بہتے ہوئے چشم بھی اللہ کے حکم کی بجا آوری کرتے دکھائے دیتے ہیں۔

وابستہ سب ہیں نظمِ قضا و قدر کے ساتھ

لیل و نہار بھی، روشِ روزگار بھی

تشریح:

ابتدائے آفرینش سے ہی قدرت کا ایک واضح نظام ہے ۔ انسان تقدیر کا پابند ہے۔ روز ازل سے اس نظام میں کوئی بے ترتیبی واقع نہیں ہوئی۔ اس کائنات کے تمام مخلوق اسی نظام کے پابند ہیں۔ دن رات ہو یا روزی کمانے کے انداز سب کچھ اسی کے نظام سے جڑا ہوا ہے۔ اللّٰہ تعالیٰ ہر چیز پر قادر ہے اور اللہ تعالیٰ کے مقرر کردہ نظام کے تابع ہے۔ نیز سمندر کی گہرائیوں سے لے کر نیلے آسمان کی اونچائیوں۔ تک ہر مخلوق کی تقدیر اس عظیم ہستی نے درج رکھی ہے۔ تاریک رات کا صبح کی کرنوں سے روشن ہونا اور وقت کے ساتھ زمانے کی تبدیلی نظام قدرت کی گواہی ہے۔

یادِ خدا میں نغمہ سرا، نغمہ سنج ہیں

طاؤس بھی، ہزار بھی، صلصل بھی، سار بھی

تشریح:

پر ذی نفس اپنی اپنی زبان اور انداز میں اپنے پروردگار کی تسبیح کرتا ہے۔ مور ہو یا بلبل، فاختہ ہو یا کوئی اور پرندہ پر کوئی اس کی حمد و ثنا میں مشغول نظر آتا ہے۔ کائنات کی ہر شے خدا کی حمد و ثنا میں محو رہتی ہے۔

مجھ سے گناہگار کو بخشش کی ہے امید

اس سے کہ جو کریم ہے آمرزگار بھی

تشریح:

 شاعر پروردگار کے حضور درخواست پیش کرتے ہیں کہ میں اپنے پروردگار سے معافی کا خواستگار ہوں اور اس بات کی پختہ امید لئے ہوئے ہوں کہ وہ رحمان و رحیم مجھے بخش دے گا اور میری توبہ قبول فرمائے گا اور پروردگار تو گناہ گاروں کی امید نہیں بلکہ یقین ہے۔